Ribadavia, 3 de abril do 2025,

Queremos anunciar as datas de celebración da 41 edición da MIT-Mostra Internacional de Teatro de Ribadavia 2025, festival destacado no panorama das artes escénicas contemporáneas, que se celebrará do 18 ao 26 de xullo.

Así mesmo no día de hoxe queremos anunciar tamén a aprobación das BASES da 20ª edición do
PREMIO ABRENTE de Textos Teatrais que podedes ler aquí.

Abrimos unha nova etapa na dirección con Sabela Mendoza na dirección artística e Gena Baamonde na dirección adxunta co desexo de seguir facendo da MIT un referente cultural colectivo e un do eixos de apoio á creación, á diversidade e á pluralidade escénica.

A proposta de dirección artística pretende continuar e expandir os valores e liñas de acción da MIT Ribadavia (a conxunción de “experiencia, tradición, vangarda” que caracteriza ao festival), seguir afondando nas liñas programáticas habituais (nomes internacionais de referencia, hibridación de linguaxes, talento galego emerxente e consolidado, coproducións, residencias, os premios, actividades paralelas…), ao tempo que queremos sumar novas propostas e iniciativas.

“Escenas en tránsito” é un dos lemas escollidos para esta proposta de dirección. Escenas que transitan dunha linguaxe a outra, dun corpo a outro, dun territorio a outro, que se moven e fan que nos movamos, que producen deprazamentos. Algunhas das ideas que guiarán o traballo curatorial (proposta dramatúrxica) son:

• O indómito, o que crece nas fisuras, nas grietas.
•Laboratorios do presente, aquelas propostas que traballan pensando no hoxe dende perspectivas da complexidade, da relación dos sistemas de representación e reximes sensibles.
•Constelacións, aquelas pezas ou traxectorias que traballan en relación con outras obras ou xenealoxías; os tándems creativos; as historias dos colectivos e das agrupacións.
•Corpos en tránsito, creacións que nos falan de mudanzas, transicións
•Cartografías do xesto, propostas que trasladan paisaxes e poéticas

Formulamos esta proposta dende o desexo de seguir facendo da MIT un festival internacional de referencia para as artes escénicas contemporáneas, unha cita cultural de orgullo colectivo –para a cidadanía de Ribadavia e para a sociedade galega en xeral–, e un contexto artístico de primeiro nivel, que celebra a pluralidade e a diversidade.

A MIT aposta polo mellor da creación galega e internacional, por novos nomes e figuras establecidas do panorama escénico, ligando memorias e legados a novas dramaturxias, mestura e hibridación nos formatos para diluír etiquetas e fronteiras.

Estende o seu campo de actuación a iniciativas que transcenden a exhibición de pezas escénicas: para apoiar procesos de creación e produción e abrir espazos de encontro e diálogo cos públicos, divulgar a través doutras actividades de formatos non escénicos, ou construír redes de colaboración con outros axentes e citas culturais.

En definitiva, un festival que non se limita ás súas datas de celebración, senón que reivindica e celebra a súa existencia como axente cultural e dinamizador tanto para a comunidade artística e profesional como para a sociedade en xeral.